A iniciativa congregou na comarca a case 800 turistas e visitantes, confirmando un incremento do 36% con respecto a 2023

O presidente da Ruta do Viño de Valdeorras, Joaquín Sánchez, cualificou de rotundo éxito a espectacular acollida da ‘Primavera de Portas Abertas’ da Ruta do Viño de Valdeorras. Joaquín Sánchez salientou que se superaron incluso as previsións ao rexistrarse unha participación de 789 personas que se achegaron a comarca no marco desta iniciativa. O incremento de visitas con respecto a 2023 foi do 36%, o que consolida a tendencia á alza rexistrada nas últimas edicións.

O presidente da Ruta do Viño de Valdeorras destacou a alta participación en todas as actividades programadas. Neste sentido, salientou que se desprazaron á Valdeorras 163 personas nos buses do viño e 269 fixérono pola súa conta.  Joaquín Sánchez puxo en valor que 169 personas participaron nas actividades programadas, houbo 60 pernoctacións e 128 menús especiais nos establecementos colaboradores. “Isto confirma o interese que están espertando os nosos viños e as nosas paisaxes entre os turistas que buscan unha alternativa de lecer baseada na calidade dos produtos e tamén na natureza”, subliñou.

Joaquín Sánchez tivo palabras de recoñecemento para os establecementos da zona que se uniron a organización desta actividade e salientou que sigan a colaborar en futuras edicións para así consolidar Valdeorras como unha comarca referente en Galicia en enoturismo.

Finalmente, o presidente da Ruta do Viño de Valdeorras amosou o seu desexo de que as outras catro rutas do viño –Rías Baixas, O Ribeiro, Ribeira Sacra e Monterrei- teñan o mesmo éxito na celebración das súas ‘Primaveras de Portas Abertas’. Ao tempo, agradeceu moi especialmente o apoio recibido da Axencia de Turismo de Galicia, á que se referiu como “entidade moi comprometida coa proxección turística de Valdeorras”.